დედაენის სწავლება ახალი კონცეფციით

თბილისის 34-ე საშუალო სკოლა (“ქართული სასწავლებელი”) უკვე ათი წელია ისე ავითარებს სასწავლო პროცესს, რომ ძირითად ყურადღებას უთმობს თანამედროვე საზოგადოების მოთხოვნებს. ადრესატი XXI საუკუნის მოასწავლეა, რომლის შემეცნებითი ინტერესი მნიშვნელოვნად გაზრდილია... მოსწავლემ პირველსავე კლასში უნდა გაიაზროს, რომ იგი სამყაროს ისეთი წევრია, რომელსაც შესწევს უნარი გაიგოს, მიიღოს, გაითავისოს და დაუკავშირდეს სამყაროს მთლიანობასა და კანონზომიერებას, როგორც ერთადერთი – ერთადერთს. სახელმძღვანელოს საფუძვლად სამყაროს მთლიანობის იდეა უდევს და მოიცავს სხვადასხვა სასწავლო დისციპლინების ელემენტებს.

ავტორები მიიჩნევენ, რომ ტრადიციული “მზა ცოდნის” მიწოდების მეთოდიკა არ ამართლებს და გთავაზობენ ინტერაქტიულ მიდგომას: ბავშვები თავად უნდა მივიდნენ მათ წინაშე წამოჭრილი პრობლემის გადაწყვეტამდე. ამგვარი სწავლების პრინციპი ბავშვს უფრო აქტიურს, შემოქმედებითსა და დამოუკიდებელს ხდის.

რას ფიქრობენ ექსპერტები სახელმძღვანელოს შესახებ?

● “წარმოდგენილი სახელმძღვანელო ითვალისწინებს სტანდარტის მოთხოვნებს და საგაკვეთილე მასალა, ასევე დაგეგმილი აქტივობები, გათვლილია ეროვნული სასწავლო გეგმის სამივე მიმართულების (ზეპირმეტყველება, კითხვა, წერა) შედეგების შესასრულებლად. ამასთან, დაცულია ბალანსი სტანდარტის მიმართულებებს შორის (განსაკუთრებით ხაზგასასმელია ის, რომ სახელმძღვანელოში დიდი ყურადღება ექცევა ბავშვის მეტყველებას, ლოგიკურად და ენობრივად გამართული წინადადებების გადმოცემის უნარის განვითარებას – რაც აქამდე, ხშირად იყო უგულებელყოფილი). სახელმძღვანელოს უდავო ღირსებაა ის, რომ წიგნი მთლიანად მოსწავლეზეა ორიენტირებული, მოსწავლე ცოდნას იღებს აღმოჩენის გზით და არა მზა სახით”.
● “მოსწავლის წიგნში მოცემული ტექსტები (მოთხრობები, ლექსები, ნახატები) აგებულია ცხოვრებისეული სიტუაციების მიხედვით; ამდენად, ითვალისწინებს მათს ინტერესებს”.
● “ტერმინები და ცნებები სწორადაა განმარტებული – ბავშვისათვის გასაგები, მარტივი ენით და, რაც მთავარია – მეტწილად მოსწავლე თავადვე განმარტავს ამა თუ იმ მოვლენას, ცნებას, ახალ ტერმინს”.
● “სახელმძღვანელო დაწერილია მოსწავლისათვის გასაგები, საინტერესო ენით; გათვალისწინებულია თანამედროვე სალიტერატურო ქართულის ნორმები.“
● “ცოდნის ინტეგრირების პუნქტში წარმოდგენილი სახელმძღვანელო უდავოდ მაღალ შეფასებას იმსახურებს”.
● “ავტორთა დამსახურებად მიგვაჩნია მათი განსაკუთრებული მიდგომა მოსწავლეებისადმი: სახელმძღვანელო მოსწავლეს თავს არ ახვევს ავტორისეულ ემოციებსა და შთაბეჭდილებებს და მაქსიმალურ თავისუფლებას`შემოქმედებითობას უტოვებს მას”.
● “სავარჯიშოები, აქტივობები, დავალებები ხელს უწყობს მოსწავლის დამოუკიდებლად მუშაობის უნარის განვითარებას. სახელმძღვანელო ითვალისწინებს წყვილური და ჯგუფური მუშაობის ხელშეწყობას. განსაკუთრებით გამოვყოფდით ლოგიკური აზროვნების განვითარებისთვის შერჩეულ ორიგინალურ და გემოვნებით შექმნილ სხვადასხვა ტიპის სავარჯიშოებს”.
● “მასალის წარდგენისას ავტორები ითვალისწინებენ მოსწავლის მოტივაციას; საკითხები მკაფიოდაა დასმული, განსაზღვრულია მიზანი და ამოცანები; გემოვნებითაა შერჩეული ტექსტები და ილუსტრაციები; უხვად არის მოცემული როგორც კლასში სამუშაო, ასევე სახლში გასაკეთებელი სავარჯიშოები; გათვალისწინებული და სტიმულირებულია ბავშვის დამოუკიდებელი მუშაობა”.
● “წიგნში ნაბიჯ-ნაბიჯ, თანდათანობით ხდება ცნებების შემოტანა და ინფორმაციის მოცულობის ზრდა; ტერმინთა და ცნებათა განმარტება ხდება ილუსტრაციებსა და თვალსაჩინოებებზე დაყრდნობით”.
● “სახელმძღვანელოსთვის შერჩეული მეთოდიკა ხელს უწყობს სწავლის სწავლას: ინსტრუქციაში (რომელიც მასწავლებლის წიგნშია მოცემული) მითითებულია დავალების შესრულების ეტაპები, შემოთავაზებულია ცოდნის ორგანიზების გარკვეული ხერხები, შეფასებისა და თვითშეფასების სქემები”.
● “სახელმძღვანელოში მოცემული სავარჯიშოები მრავალფეროვანი და, რაც უდავოდ დასაფასებელია – ორიგინალური და არასტანდარტულია, რაც საშუალებას აძლევს მასწავლებელს, თავიდან აიცილოს შინაარსის მიწოდების ერთფეროვნება”.
● “მრავალფეროვან სავარჯიშოთა სიუხვე საშუალებას აძლევს მასწავლებელს, შეარჩიოს სხვადასხვა სირთულის დავალებები სხვადასხვა შესაძლებლობის მოსწავლეებისთვის”.
● “სახელმძღვანელოში მისი შემადგენელი კომპონენტების (ტექსტი, სავარჯიშო, თვალსაჩინოება) თანაფარდობა შეესაბამება საგნის სპეფიციკას და მოსწავლის ასაკს”.
● “სახელმძღვანელოს ფორმატი, ილუსტრაციების ხარისხი, შრიფტების ზომა და ა.შ. მაღალ დონეზეა შესრულებული”.

რა შედეგებს მიაღწევთ, თუ ამ წიგნით ასწავლით?

● სწავლის პროცესი იქნება აქტიური და სახალისო. სახელმძღვანელო ისეა აგებული, რომ მასწავლებელი მხოლოდ მიმართულებას აძლევს ბავშვს, ის კი თავად აღმოაჩენს ცოდნას; მრავალფეროვანი და სახალისო სავარჯიშოები საშუალებას მოგცემთ შეინარჩუნოთ ბავშვების ინტერესი და აქტიური ჩართულობა გაკვეთილის პროცესში.
● მოსწავლე სწრაფად აითვისებს კითხვას. სახელმძღვანელოს I ნაწილი იწყება ფრაზებითა და მათი შესაბამისი ნახატებით, რომლებიც ბავშვის გარემომცველ სამყაროს ეხება და რომლითაც ის სამყაროს მთლიანობად აღიქვამს. ავტორები ამ შემთხვევაში ხელმძღვანელობდნენ იაკობ გოგებაშვილის მოსაზრებით: “ენის სიცოცხლე იწყება ფრაზებიდან და რამდენიც ადრე გადახვალთ ფრაზებზე, იმდენად უფრო უკეთესია. ვიდრე ბავშვი მხოლოდ სიტყვებს კითხულობს, ის მიხვედრილი არ არის, რის მაქნისია კითხვა. ამ საიდუმლოს – კითხვის მნიშვნელობას მხოლოდ მაშინ იგებს და გრძნობს, როდესაც ფრაზებზე გადადის”.
● მოსწავლეს განუვითარდება ზეპირი და წერითი მეტყველების მაღალი კულტურა. საგანგებოდ შერჩეული მაღალმხატვრული ტექსტები და წერითი რვეულის ტრადიციულ ბადეზე დაფუძნებული სისტემა წარმატებით შეგასრულებინებთ ზემოთ ჩამოთვლილ ამოცანებს.

მოსწავლის წიგნში წარმოდგენილი თემების სქემა

გსურთ მეტი შეიტყოთ?

გსურთ თავად იხილოთ წიგნი და უფრო ახლოს გაეცნოთ მას? ამის შესაძლებლობა გაქვთ განათლებისა და მეცნიერების სამინისტროს მიერ ყოფილი რაიონული განათლების განყოფილებების ბაზაზე შექმნილ რესურს-ცენტრებში. მიაკითხეთ ასეთ რესურს-ცენტრს თქვენს რაიონში და იქ დაგხვდებათ “მე და დედაენა” – მოსწავლის წიგნი, “მე და დედაენა” – წერის რვეული და “მე და დედაენა” – მასწავლებლის წიგნი. მათი გაცნობა საფუძვლიან წარმოდგენას შეგიქმნით ავტორთა კონცეფციისა და სწავლების მეთოდის შესახებ. გარდა ამისა, დაურეკეთ გამომცემლობაში ჩვენს კონსულტანტებს ან გამოგვიგზავნეთ იმეილი (იხ. დაგვიკავშირდით) და მათგან მიიღებთ ინფორმაციას 2006 წ. მაის-ივნისში მსურველთათვის უფასო ტრენინგების განრიგის შესახებ 34-ე საჯარო სკოლაში (“ქართული სასწავლებელი”). გარდა ამისა, მსურველებმა ჩააწერინეთ კონსულტანტს თქვენი სახელი, გვარი და სკოლის მისამართი: ჩვენი წარმომადგენელი ეცდება გეწვიოთ თქვენთვის სასურველ ვადაში და სრულიად უსასყიდლოდ გაგიწიოთ სათანადო კონსულტაცია თქვენთვის საინტერესო საკითხებზე.

სახელმძღვანელოს კომპლექტი საჩუქრად!

იმ შემთხვევაში, თუ თქვენი სკოლის დაწყებითი კლასების მასწავლებელთა საბჭო ოფიციალურ გადაწყვეტილებას მიიღებს (დამოწმდება დირექტორის ხელმოწერითა და სკოლის ბეჭდით განათლებისა და მეცნიერების სამინისტროში წარსადგენად), რომ “მე და დედაენა” 2006 წელს გახდეს თქვენი პირველკლასელების სახელმძღვანელო, გამომცემლობა საჩუქრად გადმოგცემთ სრულ კომპლექტს (სამივე წიგნს) თქვენი სკოლის დაწყებითი კლასების თითოეული მასწავლებლისთვის.

კონსულტანტები:

ალა ნაჭყებია ტელ: 25-02-58, მობ: 899-25-01-64

დიმიტრი გოგიძე ტელ: 25-02-58, მობ. 877-74-16-54